وتاليتها مع طلال بن خالد؟
- 10
سالفتي اليوم ببديها بدون مقدمات بسؤال صريح وصارم جدا اوجهه للمواطن الصالح طلال بن خالد …
وتاليتها معاك يا طلال يا بن خالد يا بن أحمد يا بن جابر يا بن أحمد يا بن صباح ؟
وين تبي توصل بمكانتك وقدرك عندنا ؟
شنهو حجم الحب اللي ناوي تستحوذ عليه بقلوبنا ؟
بالنسبة لي ما اقدر أتكلم وايد ولا اسرد اكثر لأنك اتعرف عدل شنهى مكانتك عندي اللي عسا ربي ما يبينها إلا بالخير، وهذا اللي خلاني وايد اتردد قبل لا اكتب هالجم سطر لأن ما ابي افتح أي مجال حق بلاعين البيزة من مرتزقة السوشيال ميديا وغيرهم بالتبربر الزايد والكلام اللي ماخوذ خيره .
بس الأمانة اللي حملني إياها أهل الكويت بمختلف أطيافهم وبيئاتهم ومستوياتهم التعليمية والثقافية والإجتماعية اهي اللي خلتني اجدم واكتب .
ترا ما يصير طال عمرك وطبعا أقول طال عمرك مو لأنك شيخ ولد شيخ انت عارفني وخابرني عدل لا ني من ربع تمسح الجوخ والتميلح والتحيلق ،ولا انت من ربع البهرجة وال show off ، انا أقول طال عمرك من زود المحبة والمعزة والقدر .
صج يابو خالد وين تبي توصل بمكانتك وقدرك بقلوبنا تراك ما خليت ولا بقيت الله يسلمك واتعبت من بعدك الله يحفظك ، من دشيت حكومة الغالي سمو الرئيس أحمد بن نواف والكويت وأهلها ما عندهم لا حجوه ولا سالفة غير حبيب الشعب ويا طلابة حبيب الشعب ، لدرجة ان الشعب غير النشيد الإسبوعي اللي ينشده كل أسبوع من ” هلا بالخميس ” ليمن “هلا في بوخالد العزيز “، وطبعا انا اولهم مع الكشرة اللي تارسة ويهي من الفك ليمن الفك والشربكه اللي صكت على شربكة القبقب بزمانه .
ففعلا هلا في بوخالد العزيز ، وهيبة بوخالد الحبيب ، وانجازات بوخالد اللي تشرح القلب وتسر الخاطر وتخلى الواحد يقول وينك من زمان .
بوخالد الكلام اللي قاعد تقراه الحين مو كلامى لأن روابي شهادتها فيك مجروحه ، الكلام اللي قاعد تقراه كلام أهل الكويت اللي والله العظيم يا بوخالد كل يوم توصلني منهم رسالة يقولون لي روابي واللي يسلمج وصلي كلامنا حق بوخالد ، وفعلا وصلتك لك لأكثر من مره كلامهم ودعائهم لك وبنفس الوقت نقلت لهم رسالتك اللي من عمر الدنيا انت ماخذها دستور لك ” الكويت وأهلها فوق راسي وانا تحت امرهم وبخدمتهم ” .
علشان جذي يا حبيب الشعب الكويت كلها عن بكرة أبيها أجمعت على كلمة وحده طالعه من صميم القلب ” مشكور وعساها ما تكوبك يابوخالد ، مشكور على تطبيقك للقانون على نفسك قبلنا ، مشكور على إنسانيتك اللي لها اول بس مالها تالي ، مشكور لأنك خليتنا نحس بالعدل وان ماكو لا شيخ ولد شيخ ولا تاجر ولد تاجر ولا نائب ولد نائب ولا وزير ولد وزير ولا متنفذ ولد متنفذ ولا ضابط ولد ضابط ولا مشهور ولد مشهور فوق القانون ، مشكور لأنك كل يوم تثبت لنا ان الكويت للحين لها من يحبها ويخلص بحبها وحب أهلها فعل مو بس قول ، مشكور لأنك كل يوم تثبت لنا ان على التمردغ اللي تمردغناه السنين اللي طافت من فساد تسبب فيه بعض الشيوخ وبعض التجار وبعض المتنفذين وبعض بلاعين البيزة ان الكويت للحين بخير وان الخير بقبال وان وطن النهار شمسه عمرها ماراح تغيب ، مشكور لأنك من دشيت حكومة الغالي ولد الغالي سمو رئيس مجلس الوزراء الشيخ أحمد نواف الأحمد الجابر الصباح وانت سند وعون له ، مشكور لأن سياسة اضحك بويهك واطقك بظهرك ما تمشى عندك ولا يوجد لها أي مكان بقاموسك ، مشكور لأن خليتنا ننام واحنا مرتاحين ومتطمنين ان حقنا لو كان عند منو ما راح يضيع ولا يقدر أي كان يلف ويدور وياخذه بالطرق اللي متعودين عليها الشيف والغيف اللي حسبالهم ان الدنيا بكيفهم وانهم فوق القانون ، مشكور لأنك انهيت عصر البلطجة مشكور لأنك سويت ديليت وبلوك لجملة ” ما تعرف انا منو ؟ من منهج الحياة بالكويت ، مشكور لأنك علشان وطن النهار وأهله عزمت انك تدش عش الدبابير وتقضى على طيور الظلام اللي عساهم الماحي اللي يمحيهم ويفكنا منهم .
طلال بن خالد مشكور لأنك ريال عن دولة كاملة.
روابي البناي .
سالفتي اليوم ببديها بدون مقدمات بسؤال صريح وصارم جدا اوجهه للمواطن الصالح طلال بن خالد … وتاليتها معاك يا طلال يا بن خالد يا بن أحمد يا بن جابر يا بن أحمد يا بن صباح ؟ وين تبي توصل بمكانتك وقدرك عندنا ؟ شنهو حجم الحب اللي ناوي تستحوذ عليه…
سالفتي اليوم ببديها بدون مقدمات بسؤال صريح وصارم جدا اوجهه للمواطن الصالح طلال بن خالد … وتاليتها معاك يا طلال يا بن خالد يا بن أحمد يا بن جابر يا بن أحمد يا بن صباح ؟ وين تبي توصل بمكانتك وقدرك عندنا ؟ شنهو حجم الحب اللي ناوي تستحوذ عليه…