اتهقون إشحقه ؟
- 12
سالفتي معاكم اليوم شوي بعيده عن خفسة وشقراء اليمامه وغيرهم من النماين اللي ربى بلانا فيهم علشان يمتحن صبرنا وقوتنا على تحمل البلاء ، سالفتي اليوم طرت على بالي وانا منشكحه على ال lazyboy وبيدي بيالة شاي الحليب الخنين اللي اخشه عن صديجي من نطاعته ، ومجابله التلفزيون انطر الخائن يهل هلاله يبدي علشان نشوف شنهى اخرتها مع ام كشه ” تيا بنت عماد الزين ” وحرب البسوس اللي بينها وبين ام ويه ممقوط الدكتورة ” اسيل حداد ” على شين الحلا ” سيف الجابي ” يا عل ماكو ” سيف ولا اكو جابي ” .
سالفتي اليوم عباره عن كلمة سهلة بكتابتها بس وايد عميقة بإجابتها لأنها لها اول بس مالها تالي من كثر ما اهي تشغلنا وتمسنا وتهمنا ، سالفتي اليوم سؤال بسإله حق نفسي قبلكم وأتمنى تشاركوني اجابتكم عليه ..
- إشحقــــــه ؟
- اتهقون إشحقه المواطن الكويتي الطيب الخفير رفع شعار عافك الخاطر خلاص وطلق ثقته بالحكومة الرشيده بالثلاث وما عنده أي إستعداد يعور راسه ويسمع شنو خرايط طريجها وشنو بتسوى وشنو ماراح اتسوي ؟
- اتهقون إشحقه الشعار المرفوع بوطن النهار بالوقت الحالي ” من صادها عشا إعياله ” ؟
- إتهقون إشحقه حكومتنا اللي إن شاء الله انها رشيده وتحبنا وتخاف علينا وتذود عن مصالحنا ما تحط مقولة أبو الدستور الشيخ عبد الله السالم رحمة الله عليه ” سأجعل منكم شعبا عظيما وستستمتعون برفاهية هي اكبر كثيرا من تلك التي عرفها اجدادكم ” جدام عيونها وتشتغل على أساسه ؟
- إتهقون إشحقه واحنا بسنة 2024 وللحين حكومتنا الرشيدة ما فكرت تغير نظرتها الثاقبة للأمور واللي حتى بوحقب ما يقدر ينظرها واللي ابصم انها راح تكون نفسها عقب مليون سنة .
- اتهقون إشحقه وطن مثل وطن النهار يستاهل كل شى فوق الزين حكومته لما قررت اتييب اليهده وتقول الزين عندي وانا بوهندي سووا حق الشعب مسابقة أحسن تصوير للحفر والشوارع المكسرة ؟
- إتهقون إشحقه بيت الأمه اللي يفترض يمثل الأمه ويخاف على مصالح الأمه ويدافع عن حقوق الأمه ما يدري عن الأمه ولا يدري عن هوى دارها .
- إتهقون إشحقه كل اللي اجغدوهم يغسلون ويبوقون وينهبون ويدوبرون مع البنغاليه ويعبثون بالأرض فسادا من غير لا خوف من الله ولا رجا ما عليهم قاصر وكلهم قبل إسمهم يا شيخ يا وزير يا وكيل يا نائب ؟
- إتهقون إشحقه ثقافة ” الضمير الكلوش ” صارت اهي المنتشره بوطن النهار ، واستفحل ” التخنبق ” الطائفى والمذهبي والإخونجي والعائلي واللي خلانه ” مكانك راوح ” .
- إتهقون إشحقه المعلم بوطنى الغالي اللي المفروض يكاد يكون رسولا مسوي اعتصام وعاقد النونه وموعاجبه تطبيق البصمة ؟
- إتهقون إشحقه ثلاث ارباع اللي محسوبين علينا مواطنين شرفاء وصالحين ماخذين الجنسية بالجمبزه والاحتيال ، وصار لهم اسنين وابنين يرتعون من خيرات هالديرة على اساس انهم مواطنين وما بقى بيوت ما خذوها وأجروها ، ومابقى تراخيص ما طلعوها واستغنوا من وراها ، وما بقى اقامات ما تاجروا فيها ، وما بقى مستشفيات وادوية ما ازحروها ، ومابقى جواخير ومزارع ما لطوها واخر المتمه عقب ما كنه اناديهم بوخليفه وبوعزيز أطلعت اساميهم بونضال وبوعلاوي .
- إتهقون إشحقه ماعندنا إجابة وين راح تاريخ وطن النهار الرياضي اللي بنوه رياييل الدروازه وضعيوه رياييل المطنزه والعازه .
- إتهقون إشحقه قبل لا نروح مراجعاتنا الحكومية والطبية لازم يكون عندنا دنانير علشان دهان سير العم كومار و المستشار حمدي يرضون علينا ويخلصون معاملاتنا ويجدمون مواعيدنا .
- إتهقون إشحقه المواطن الكويتي عمره يصك الاربعين وللحين يطحس بالإيجار او متقلقص في بيت ابوه مع كوكش اليهال اللي عنده بسبة طابور الجمعية الاسكاني اللي مايندرى متى بيخلص واللي مفروض ما يكون اصلا موجود في بلد مثل الكويت .
- إتهقون إشحقه خنت حيلي المواطن الكويتي يتزوج ويعيل وعياله يدشون الجامعة ، وتوه يبدي يبنى بيت احلامه اللي يطل على الحدود الكويتية العراقية او الحدود الكويتية السعودية .
- إتهقون إشحقه كل شهر إنق بين 300 الى 400 دينار تكلفة تغيير تواير السيارة الليى هرقلتهم وقالت فيهم شوارع وطني الغالي بسبة المناقصة اللي رست على هذا ولدنا عطوه وهذا حبيبنا لا تبخلون عليه .
- إتهقون إشحقه امبير ” الطلاق ” وصل أعلى مراحله بوطني الغالي ودهاليز محاكم الأحوال الشخصية تنتفض من كثر الهوايل اللي فيها .
- إتهقون إشحقه انعدمت المتعه والأناسة باللي عندنا وصارت الشفاحة وتبقق العين على اللي مو عندنا ؟ وأبشركم هالشفاحه والعين الضيجه تعدت مرحلة الكماليات ووصلت بحمد الله ورعايته الى مرحلة البشر .
- إتهقون إشحقه طفح النفاق الاجتماعي وصار مثل الوباء اللي ما يفيد معاه لا تطعيم ولاطبيب ولا مداوي ؟ يعني عادي جدا السوسه اللي بقروب يمعة الخميس تكتب قصيدة حب وغزل بفلانه اللي معاها بالقروب واللي امس كانت عزيمتها وما بقى صوره بفلتر نهى بنت نبيل ما صورتها معاها وتكتب تحتها السنع كله والعدال كله والجمال كله الغاليه فلانه تحطينه من يسر يارب ، وبنفس الوقت تلقاها مقطعه يمبها بقروب يمعة اليمعة اللي ما يواطنونها وما بقى مصطلح بقاموس الذم ما قالته عنها وعن عزيمتها … ( من أنتم ؟؟؟ ) .
- إتهقون إشحقة بعض الرياييل والحريم بوطني الغالي كل ما اكبروا ادبروا ؟ يعني بدال لا يكونون قدوه بالسنع والمنع والعدال يصيرون نقمة حق اللي حواليهم .
- إتهقون إشحقة رد علينا موديل ( المحارب ) ومدة البوز مال المدارس قبل ؟ واللي الواحد للأمانه يفتشل يسولف عنه لأنه بطلاته كل وحده كبر أمى منيرة رحمة الله عليها وفيها شدة المحارب والمجادل والمداقل وتشرط وتقول إذا بتعزمون فلانه وربعها ما ني يايه وغيرها من السخافات اللي ربي يبعدنا ويرفعنا عنها .
- إتهقون إشحقه وصل الإسترخاص أعلى مراحله عند بعض البنات ، وقاموا يتنافسون منهي بتكونTOP 10 ماراثون لستة الجذب واليور بوطن النهار ؟
- إتهقون إشحقة صار بوق الرياييل من حريمهم وعيالهم وخراب البيوت العمرانه موضة حق بنات إبليس هالأيام وعلى عينك ياتاجر ؟ .
أخر المتمة ….
بالنسبة لي هذي بعض التساؤلات اللي تدور في مخيخي الأيمن وتوها تدبي صور مخيخي الأيسر ، بس وقفتها علشان اترك لكم المجال تقولون تساؤلاتكم …
روابــي البــناي
سالفتي معاكم اليوم شوي بعيده عن خفسة وشقراء اليمامه وغيرهم من النماين اللي ربى بلانا فيهم علشان يمتحن صبرنا وقوتنا على تحمل البلاء ، سالفتي اليوم طرت على بالي وانا منشكحه على ال lazyboy وبيدي بيالة شاي الحليب الخنين اللي اخشه عن صديجي من نطاعته ، ومجابله التلفزيون انطر الخائن يهل هلاله يبدي علشان نشوف…
سالفتي معاكم اليوم شوي بعيده عن خفسة وشقراء اليمامه وغيرهم من النماين اللي ربى بلانا فيهم علشان يمتحن صبرنا وقوتنا على تحمل البلاء ، سالفتي اليوم طرت على بالي وانا منشكحه على ال lazyboy وبيدي بيالة شاي الحليب الخنين اللي اخشه عن صديجي من نطاعته ، ومجابله التلفزيون انطر الخائن يهل هلاله يبدي علشان نشوف…