الله يعزك ولا يعز عليك يا أحمد يا ولد شريفة

  • 8
الله يعزك ولا يعز عليك يا أحمد يا ولد شريفة

سالفتي  اليوم للكبار فقط …

وأقصد بالكبار كبار العقل والأخلاق ومو الكبار بالعمر لأن موكل كبير كبير ، في وايد كبار وتشوفونهم على قولة اهل ” ام الدنيا ” ماليين هدومهم وماسكين مناصب بس ربيتهم ناقصة وما يدرون وين الله قاطهم وما اكثرهم بوطني الغالي للأسف .

 

المهم أرد وأقول سالفتي اليوم للكبار فقط لأنها تخص شخص جبير  بكل شي بمقامه وقدره وتفكيره وأخلاقه وتعامله الفوق الراقي مع الصغير قبل الكبير  ، جبير بتسامحه ، جبير بحبه للكويت وأهلها ، سالفتي اليوم اوجهها لجبير الإسم والبخت سمو رئيس مجلس الوزراء الشيخ / أحمد نواف الأحمد الجابر الصباح ربي يحفظه ويوفقه ويعلي قدره ويبط مرارة اللي ضده.

 

سمو الرئيس لأني اعرف شخصك الكريم وأعرف انك ما تحب المدح ، وايد تحرصت بكتابة هذي الأسطر لأن خاطرك جدا شى جبير عندي مثل قدرك اللي ربي لا يبينه …

 

بس انا اليوم ما أتكلم باسم روابي البناي أتكلم بإسم أهلك اللي حملوني أمانه جدا جبيره وما قدرت اني ما انقلها ولا اوصلها لك ، اليوم انا أتكلم باسم اهل الكويت اللي انت شرفتهم وبيضت ويوههم وانت تمثل دولة الكويت من على منبر الأمم المتحدة وانت تلقى كلمة دولة الكويت أمام الجمعية العامة للأمم المتحدة في دورتها ال 78  ، أهل الكويت اللي يفتخرون فيك ويقولون لك مشكور يا بونواف وعسا عينهم ما تبجيك  ، أهل الكويت اللي يقولون لك …

 

–  مشكور يابونواف لأنك مثلت حضرة صاحب السمو أمير البلاد المفدي الشيخ  / نواف الأحمد الجابر الصباح أمام الجمعية  العامة للأمم المتحدة خير تمثيل .

–  مشكور يا بونواف لأنك قدرت تسوي اللي وايد غيرك ما قدر يسويه باختيارك لكلمة اقل ما يمكن وصفها انها بالصميم تضمنت قضايا هامه يتراعد غيرك من التطرق لها .

–  مشكور يا بونواف لأنك وجهت الرسايل بدون لف ولا دوران اللي غيرك يأخذ امتياز مع مرتبة الشرف فيه .

– مشكور يا بونواف لأنك ما جاملت على حساب الكويت ومصلحة الكويت وأهلها .

–  مشكور يا بونواف لأنك حطيت الخطوط الحمرا اللي خلت كل من تسول له نفسه الأماره بالسو انه ينوي يستولى على احصمة من حصم الكويت يكع بريك قوي ويرد مكانه .

–  مشكور يا بونواف لأنك بعز المعمعه اللي حايشه العالم من كل صوب ما نسيت فلسطين ولا أهلها وخليتها من أولى اولياتك وانت تتكلم .

– مشكور يا بونواف لأن شبيت اللمبه الحمره بكلمتك بخصوص المسجد الأقصى وقلت اللي غيرك من المتأسلمين ما يقدرون يقولونه علشان مصالحهم ومصالح جماعاتهم  …

 

هذي رسالة اهل الكويت لك يا بونواف ، اهل الكويت اللي يحبونك من محبة ابوك ربي يطول بعمره ويخليه للكويت وأهلها ،  ومحبة والدتك  اللي عطايا يمينها يسارها ما تدري عنها وان شاء الله اني أكون وصلت الأمانه اللي حملوني إياها طال عمرك ..

 

وعقب ما وصلت الأمانه حق صاحبها احب اني أوجه رساله  شكر حق حكاكيك الجدر بس مو أي حكاكيك ، لأن بعض الحكاكيك اهم من الطبخه نفسها خاصة إذا كانت حكوكة مشخول محيوف حوف أصلى متروس زعفران وبصل وريحته اتبط الراس بط من حلاتها ، الحكاكيك اللي اقصدهم بالضبط اهم بقايا جدر امصدي امخفس امطقق من كل صوب ،  يندرجون من  فصيلة  ” مرتزقة السوشيال ميديا ”   اللي لا فايدة لهم ولا عايده ولا رجا ، غير انهم قاعدين بجحورهم مثل الفيران الموبوءه الله يكافينا الشر رهن إشارة معازيبهم اللي مشغلينهم علشان يبثون سمهم واذاهم على خلق الله ، لأن هذا المعزب الفاشل الناقص أقصى شي يقدر يسويه انه يحط له جم فار ينخش ورى حسابات وهمية في الطير المدلقم ويستلم خلق الله سب وقلة حيا بالمختصر ان هالفيران عاله على روحهم قبل لا يكونون عاله على المجتمع اللي اهو بري منهم ومن فعايلهم .

 

ابي أقول حق هالمرتزقة المأجورين اللي الدينار يحركهم شكرا لأنكم كل يوم تثبتون لنا أن ما فيكم غيره على وطنكم ولا أهل وطنكم لأن اللي فيه غيره على وطنه ما يسوي سواتكم ولا فعايلكم ، شكرا لأنكم كل يوم تعطونه درس مجاني بأن الإحترام صفة مو الكل يقدر عليها ولا الكل يقدر يتحلى فيها ، شكرا لأنكم كل دقيقه تأكدون لنا ان الأخلاق نعمة نحمد ربنا عليها ، شكرا لأنكم خليتونا نتعرف على اشكال  وارناق عبدة الدينار اللي للأسف بدوا يترسون وطن النهار .

وأخيرا رسالتي اللي اوجهها من القلب الى القلب الى آل صباح الكرام

يمكن ما تربطنى علاقة  اخوه وصداقه فيكم كلكم بس البعض اللي اعرفه منكم يخلينى اقول والنعم فيكم كلكم، كلامى لكم اليوم طالع من القلب وخالى الدسم من أي شى يمكن عودوكم عليه الفداويه والمرتزقه سواء الحريم ولا الرياييل اللي يتلصقون فيكم علشان يترززون ويتنفعون من وراكم ، عفية ترا احنا انحبكم ، وما نرضى عليكم ، ولا نسمح حق أي كان يتعدى عليكم ، ايه انحاسبكم وانعاتبكم ونشره عليكم بس بينا وبين بعض لأن احنا من وعينا على هالدنيا واهلنا عودونا ان الصباح اهلكم والصباح منكم  وفيكم  علشان جذي عفيه واخروا عنكم بلاعين البيزه اللي كل مالهم ايرونكم لى ورا والله يستر من الهاويه اللي بقطونكم فيها لأن كل اللي يهمهم بالموضوع الهمجه اللي ياخذونها منكم وبس وبنفس الوقت خصمكم يأشر لهم بنوط اكثر من الأنواط اللي تعطونهم اياها ويروحون يطقونكم ويعطونه كل مفاتيحكم ، عفيه خلوا عنكم توافه الامور وشغل مصبنة السكيك والطق من تحت الحزام واحسموا أموركم من جذورها   بينكم وبين بعض ولا تدخلون حكاحيك الجدر بينكم لأن احنا ما نرضى عليكم ولا راح نرضى عليكم لأن الكويت واهلها مالهم وجود من غير ال صباح ، علشان جذي عفيه خافوا الله فينا وفي الكويت وفي روحكم .

 

روابي البناي

الله يعزك ولا يعز عليك يا أحمد يا ولد شريفة سالفتي  اليوم للكبار فقط … وأقصد بالكبار كبار العقل والأخلاق ومو الكبار بالعمر لأن موكل كبير كبير ، في وايد كبار وتشوفونهم على قولة اهل ” ام الدنيا ” ماليين هدومهم وماسكين مناصب بس ربيتهم ناقصة وما يدرون وين الله قاطهم وما اكثرهم بوطني الغالي…

الله يعزك ولا يعز عليك يا أحمد يا ولد شريفة سالفتي  اليوم للكبار فقط … وأقصد بالكبار كبار العقل والأخلاق ومو الكبار بالعمر لأن موكل كبير كبير ، في وايد كبار وتشوفونهم على قولة اهل ” ام الدنيا ” ماليين هدومهم وماسكين مناصب بس ربيتهم ناقصة وما يدرون وين الله قاطهم وما اكثرهم بوطني الغالي…

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *