وطن الطلاق!!!

  • 7

سالفة اليوم أشوفها إتخرع وتحتاج الى وقفة بضمير مع النفس ، لأنها جدا حساسة وخطرة ، وأتوقع خطرها  يفوق خطوره العداني على المعدس لمرضى السكر ، يمكن الحين البعض بعوي حنجه ويقول امبيه اشدعوه هالتظهول  

ما عليه إذا انا أظهول ابيكم تشوفون الإحصائية المرعبة اللي انشرتها الغالية ” القبس ”  على صدر صفحتها الأولى  بعدد يوم الجمعه والسبت 29 و 30 سبتمبر 2023 واللي يقول 100 حالة طلاق في أول إسبوع زواج !!! وتعطوني رايكم هل هذا العدد عادي ؟  وما يخرع ؟

اللي يخرع أكثر أن  هالنسبة المرعبة اللي كل مالها تزيد بنجاح منقطع النظير ، البعض للأسف بدى يتعايش معاها ويشوفها شى عادي وجزء من life Style  على قولتهم  هذا من جهة ، والتغيير اللي صار بالأوادم  واللي تغيرت معاه مبادئهم وقيمهم ، وصار المستحى والمنتخى اخر الأولويات وصارت الأنواط والمظاهر اهي سيدة الموقف للأسف ، والأكيد اني ما أعمم لأن بنفس الوقت اكو للحين ناس تشوف ان هالشى مو عادي وما يصير انه يصير .

اللي يزيد الطين بله ويخلى الواحد يهذري بينه وبين نفسه لما نبحث بأسباب هالطلاق ، ونلقى  أسباب  مثل اويوهم اللي ما تسر النظر ولا تشرح القلب ، أسباب في قمة التفاهه وعدم الوعي واللامبالاة ، أسباب الواحد يستحى انه يذكرها لأنها تدل على ان وايد اكو ناس كنا نحسبهم انهم يعرفون العقل والثقل والركاده ، وان عندهم ميزان يوزنون فيه الأمور بس إتضح العكس للأسف .  

والأدهى والأمر بالموضوع أن هالأسباب  ما اطلعت  ولا ابرزت  الا عقب ما ربي قردنا بمهرجين السوشيال ميديا وفشلتها اللي يسمونهم فاشيليستات  اللي صاروا للأسف هدف وقدوه يحتذى فيها عند وايد مقاريد ، طبعا ما ابرر ولا اعطيهم  علاق يعلقون فيه خمالهم وسواد اوييهم بس هالمهرجين والفشله وايد ساهموا ان الشق يصير وايد عود .

شعار  ” ابى أعيش حياتي ”   اهو سيد الموقف بالفترة الحالية على أساس الأخت او الأخ كانوا مدفونين بالحيا واهم متزوجين ، وفجأه بقدرة قادر ربي رد فيهم الروح وقرروا يعيشون حياتهم عقب ماصاروا عيالهم طولهم ، وما يندرى  شنهى طبيعة الحياة اللي يبون يعيشونها  ؟ ومادري ليش ما يصير يعيشونها واهم متزوجين ؟

اللي يعرفني عدل يعرف اني ما اقدر اسكت ، لأن  إذا سكت تطلع براسى سدره  عليها كنار  وتوقف ” أم حنين ” تحتها تغني ألم كنار سدرتنا وصره وأقدم له إذا اقبل هدية  ، فقبل جم يوم كنت بمقعد كل اللي فيه مثلكم وشرواكم من الناس الطيبة السنعة واللي كلهم فيهم خير وابركه ، وكان من ضمن الموجودين وحده من اللي توهم تحرروا واستلموا صك الحريه على قولتهم وبادية تعيش حياتها ، واول خطوه سوتها واهي تمشى بطريح الحياة مالها قطت حجابها ، طبعا قطة الحجاب  شى راد لها لأن لبسه من عدمه  شى بينها وبين ربها مالي  شغل فيه ، فسألتها هل تطلقتي بسبة الحجاب ؟  قالت لا ؟ عيل اشحقه الله يهداج وعيالج طولج ؟ شنهو الشى اللي خله يصير فيج فرور من عنتر زمانه ريلج ؟  جان ترد على  بكل برود  روابي  من حقى اجدد ومن حقى اشوف نفسى ومن حقى احب وانحب .

عدلت قعدتي وجابلتها وبحلقت عيوني وقلت لها : نعم تشوفين نفسج ؟ ممكن أعرف شلون طال عمرج ؟

اجدد حياتي اللي صار لها سنين تمشى على نفس الروتين اللي يضيق الخلق ، من حقي اسمع كلام يديد يدغدغ مشاعري من حقي اغير الطلعات والسفرات ، يعنى لى متى ماكو شى يديد ولا اكو شى يشوقنى و يخليني احب اني اقعد مع ريلى ، بعدين انتى ما تشوفين غيرنا شلون عايش ؟ فلانه كل يوم بديره وكل يوم بحفله لا حنه ولا رنه ولا هذا قعد وهذاك طلع ولا غثا وغيره ، قلت لها انزين انتى كنتى صابره طول هالسنين  شنهو اليديد اللي استجد عليج علشان تتطلقين وتبين تعيشين حياتج ؟

جان تعطيني ما عطاني زماني ، روابي اشفيج انتى مو عايشه معانا ؟ انتى ما تشوفين فلانه اللي عيالها طولها خلت القرعه ترعى وتطلقت وكاهى خذاها فلان الفلاني وشوفي شلون يطالع ويها غضبان ولا راضى ، انا اشحقه ادفن روحى أنا اللي علي سويته وزياده ربيت وكبرت الحين يه دوري علشان اعيش ، بعدين شنهو المانع اني اعيش مثل هالفاشيليستات اللي نشوفهم اللي دهرهم زقطه بنقطه لا يحاتون شى ولا يفكرون إلا بوناستهم وين بسافرون وبشنو يلبسون  ، هذا غير المشاعر البارده اللي صارت بيني وبين طليقى ، يعنى ماكو أي احساس كلش ملش ، صرنا اخوان ، فأنا اختصرت الطريج وشريت راحتى وتطلقت والفال حق الكل والجميع لأن الشعور اللي اعيشه حاليا شى جدا حلو .

طبعا ويهي وانا اسمع هالكلام ماله وصف ولا نعت واختفت منه الملامح كلها ، حتى لساني انربط وريجى نشف وعيني صار فيها انحراف مؤقت من اللي اشوفه واسمعه . 

يمكن بعض الكلام اللي قالته هالإنسانه يكون صحيح لأن برود المشاعر والروتين شى جدا مو حلو وشى يذبح أي علاقه ، بس ما توصل اني اتطلق واشتت اسره كامله علشان اني ما قمت احس بالحب ، ماعليه تحسين في برود بينج وبين زوجج كلميه قعدي معاه فهميه سافروا بروحكم صدوا عن الأولى والتالي ، قولي له يا فلان تراني هالأيام احس ان علاقتنا كلش مو خوش وانا ما ابي هالشى يصير ، مو تطلقين علشان اتحبين مره  ثانية ، وبعدين إشدراج  الشحط اللي بتحبينه بيظل يحبج وما راح ينعاد الفيلم العربي ” لا انام  ” مره ثانية ؟؟ ، أما سالفة  تبحلقكم بحياة غيركم  ، وليش ” الهوله بنت مضاوي ” تزوجت واحد اجمل واغني من رياييلكم ولزوم انكم تسوون نفسها ، هذا الينون بعينه وعلمه ، وسالفة الفاشيليستات واشلون عايشين عاد هذي  القنبلة اللي حتى كيم جونع أون مال كوريا الشمالية طق ميخه واهو يدور لكم عذروب على هالسبب اللي كلش ما يوايه .

انتوا إشلون تقارنون حياتكم بالفاشيليستات ؟ انتوا تدرون هالنماين اشلون عايشين ؟ وشنهو الويه الثاني من حياتهم ؟ انتوا ما تشوفونهم الا واهم يلفون الأكو والماكو علشان يعلنون عن مطعم ولا قهوه ،  ولا وهم يلوصون ويوهم علشان يخلونكم وانتوا ما تدلون الدرب تروحون تشترون البودر ولا الكحلة اللي لا طين فلوس إعلانها ،  ولا وهم واقفين وقفة بزه المرتزه علشان يراوونكم الجناط والهدوم اللي عليهم واللي انتوا مثل تابعه قفه على اولكم تروحون وتخمطونهم بس علشان ينقال انكم شريتوا اللي فلانه قالت عنه وعلنتانه اوصفته انه خيال ، الصراحه حالتكم وايد صعبه ومرحلة اللاوعي اللي وصلتوا لها شى جدا يخرع ويفشل بنفس الوقت ، ماقول غير يارب الثبات .

هذا مختصر بسيط عن النمونه الأولى اللي تتطلق على علشان تنطلق في سماء الحرية وتعيش حياتها مثل ما تشوف ، أما النمونه الثانية اللي مكتسحه هالأيام  اهم ” الأناكوندات ” ، بنات إبليس اللي أحتاج  مجلدات أكبر وأطول من مجلدات كليلة ودمنه علشان اقدر اييب اليهده بوصفهم ، واللي راح اخصص لهم سالفة بروحها يمكن نسولف فيها شهر كامل ، لأن عقارب الرمل اللي مهنتهم بالحياة بس يخربون البيوت العمرانه ويبوقون الرياييل من بيوتهم ومن حريمهم كل مالهم ويتوسعون في نشاطهم اللاأخلاقي ، وفوق شينهم قواة عينهم لدرجة انها عادي تلقاها بايقة الريال من وسط بيته وزوجته وعياله وتاخذ كل ماله ودونه وعقب ما يسكرون النل عليه أهله اتخليه يولي وتروح تسري على واحد ثاني ، ولا تقعد أتطلع عذاريب الدنيا بزوجته اللي تسواها وتسوى طوايفها اللي يابوها بس الواحد شنو يقول ” آه من بطني وآه من إظهري ” الشرهه على الثور الإسترالي اللي ما صدق وحده تلوفح له بشعرها الجلاعي المنتقف من الصبغ واتسبل له بعويناتها وتمد له بوزها اللي جنه بوز  البطه تلقاه نسى ابوه واللي يابوه كلهم . يا جماعة الخير واللي يسلمكم اصحوا واوعوا ترا السالفة وايد أكبر ووايد اهم ، ترا السالفة فيها خراب مجتمع ، فيها ضياع أجيال ، فيها خلل بالتركيبة السكانية ، فيها وايد أمور أكبر واعظم من سفره ولا كلمة حلوه ولا جنطه ولارصيد بالبنك ..

واخر المتمه أعو ربي جلا جلاله ان ينزل نور من نوره العظيم على مستر هايف وربعه من أعضاء مجلسنا الموقر ينور فيه بصيرتهم ويفكرون بهالإحصائيات اللي تخرع واللي تحتاج وقفة منهم علشان لعل وعسا ينقذنون ما يمكن إنقاذه .

                                                                                                                                                                            روابي البناي

سالفة اليوم أشوفها إتخرع وتحتاج الى وقفة بضمير مع النفس ، لأنها جدا حساسة وخطرة ، وأتوقع خطرها  يفوق خطوره العداني على المعدس لمرضى السكر ، يمكن الحين البعض بعوي حنجه ويقول امبيه اشدعوه هالتظهول   ما عليه إذا انا أظهول ابيكم تشوفون الإحصائية المرعبة اللي انشرتها الغالية ” القبس ”  على صدر صفحتها الأولى  بعدد…

سالفة اليوم أشوفها إتخرع وتحتاج الى وقفة بضمير مع النفس ، لأنها جدا حساسة وخطرة ، وأتوقع خطرها  يفوق خطوره العداني على المعدس لمرضى السكر ، يمكن الحين البعض بعوي حنجه ويقول امبيه اشدعوه هالتظهول   ما عليه إذا انا أظهول ابيكم تشوفون الإحصائية المرعبة اللي انشرتها الغالية ” القبس ”  على صدر صفحتها الأولى  بعدد…

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *